موقع هرمنا الالكتروني
خالده الختاتنه – بيسالوني عن عشقي وحبي للكرك بحكيلكم كلمات نحنا الكركيه بنرددها دائما هاي الكرك كركنا وعين ساره ميتنا .. باخدكم عبر الفيديوهات والصور ولو انها مابتكفي لتغطي جمال كل المكان …
عين ساره سميت بهذا الاسم لانه متل مابحكو اقامت ستنا ساره زوجه ابراهيم الخليل عليه السلام بالمكان وشرتب من مياه عين ساره فتره من الزمن
عين ساره اجمل بقاع الارض عالارض فيها ينابيع مياه عمركم ما شربتو متل ميتها طعمتها غير والاهم كانها طالعه من تلاجه لبرودها متل التلج عذبه المذاق نقية وشفافه ينابيع بتطلع من تحت الارض بمنظر صعب يتوصف شلالات مياه بتنزل من اعالي الجبال كانها شتاء بتنزل حباته بكل هدوء لتلامس جسدك وتعطيه انتعاش وحيويه من بين الاعشاب البرية يالي تشكلت وعاشت سنين بترتوي من مياه جبالها وينابيع ارضها ..
وانا زغيره كنا نعمل رحلات مع امي وتيته وجدو وخالاتي واخوالي واخواني لي فيها كل الذكريات واجمل الذكريات كنت وانا زغيره اتطلع للكركيه ومعهم الصوف بيغسلوه بسيل عين ساره مع استراحه غداء وشاي عالفحم واوو .. كتير كانو ينامو بالسيل لانه مكان امن ومريح للاعصاب ..
باعلى سيل ومنتزه عين ساره جبل عالي عليه سفينه نوح المتحجره متل مابيحكو من زمان ولتتطلع للمنظر ابداع ومعجزة الخالق فيما خلق بتلف السيل جبال وسهوله واوديه شي بالفعل صعب يتوصف ..من ينابيع وسيل عين ساره تروى الاراضي الزراعيه وبتطلع ثمار نكهتها وطعمتها غير ..
قصص سمعتها زمان وانا زغيره بتحكي كان يطلع مارد طويل كتير لابس ابيض بابيض مبتسم بتطلع عليهم بابتسامه وبروح وكانه بحكيلهم اهلا وسهلا بكم بالمكان اجلسو ونامو بامان واطمئنان ويظهر تحت شجرة الحماط يالي مابيطلع عليها تين وبحكو يالي بياخد من ورقها وبحرقه بالبيت بتطرد الجن ..قصص رائعه لتسمعها عن المكان وانت تحت الجبل يالي باعلاه سفينه نوح عليه السلام ومقابله مقام النبي نوح وايضا غابه اليوبيل …
تم تضمين منتزه عين ساره من قبل بلدية الكرك ليتم المحافظة عليه وانجاز مايمكن انجازه لتطويره فوضعت به اعمدة كهرباء لانارة المكان ووضع كراسي وطاولات للزوار وخدمات متعدده …
مختصر بالتاكيد لعظمة المكان واجمل مكان وبكل اسف عتب كبير وكبير جدا على وزارة السياحة وعلى بلدية الكرك وعلى كل مسؤول لا يسوق ويهتم بتطوير اجمل بقاع الارض عالارض …
شهادتي بالمكان مجروحه لانه عشقي الابدي اجمل مكان محبب لي واتمنى زيارته كل يوم وباستمرارفلا ملل منه بل تكتشف كل يوم ابداع جديد ….
اتمنى من زوار المكان كركيه كانو ام اغراب المكان له مكانه عريقه وتراث ابدي وابداع الخالق اتمنى الاهتمام بنظافة المكان فهو لنا.. واتمنى مجددا من وزارة السياحة وبلدية الكرك عمل منافع صحيه للزوار وكما علمت يوجد مكان لكنه مغلق والزوار للمكان بحاجه ماسه لوجود منافع صحيه …. ولنردد دائما الكرك لينا وحقها علينا …
..
