حوار ساخن مع ولدي محمد .. بقلم الإعلامي العميد المتقاعد هاشم المجالي .

هرمنا – جلسنا سويا نتابع التلفزيون ونتحدث عن المستقبل أنا و ولدي محمد ذي الثلاث عشر ربيعا .
لقد دار حوارا بيني وبينه ورغبت بأن أنشره وأطرحه عليكم .
وكان الحوار على النحو التالي :

محمد : يا بوي لقد سمعت على شاشات التلفزيونات المحلية والعربية والعالمية ان هناك أشخاص بمجلس النواب قد شتموا الذات الإلهية.
ممكن تشرحلي يا بوي شو يعني شتم الذات الإلهية أو تفهمني إياها.

رددت عليه : لا يا محمد لا يا بوي ما حدا شتم وهذه دبلجة أصوات فقط ، وهذول الأشخاص لا يمثلون الشعب ولا حتى خياراته ، والنواب يا بوي هذول همه اصحاب الأخلاق والعلم والثقافة والسلوك المستقيم وما بيصدر منهم مثل هيك تصرفات مُشينة .

محمد : طيب مين هذول الي تهاوشوا في مجلس النواب وبكسوا بعض ..وعلى ايش تهاوشو ؟؟

رددت عليه : يا محمد هذول موظفين صِغار بالمجلس من عمال الصيانة والنظافة او أنهم ضيوف ومراجعين و تهاوشوا على شغلات مثل الإجازات والحوافز أو الإكراميات وممكن صدرت منهم مثل هيك الفاظ .

محمد : سمعت واحد بحكي انه الرئيس اذا كان عنده عجز جنسي لازم يستقيل ..فهمني اياها يا بوي !!

رددت عليه: بابا بس بتكبر وتصير شاب بفهمك شو يعني عجز جنسي وعجز وطني وعجز مستقبلي وعجز مالي وعجز بقول كلمة الحق وعجز بالانتماء والولاء وعجز بالعمل وعجز بالعجز نفسه .
محمد : في واحد من النواب حكى أن الأنبياء بيغلطوا ..هل صحيح أن سيدنا محمد وسيدنا عيسى عليهم الصلاة والسلام بيغلطوا ؟؟

رددت عليه: يا محمد هذا النائب قال الأنبياء بيِ غلٌطوا(بتشديد اللام ) الناس الذين يرتكبون الذنوب ، والتلفزيون ما كمل كلام النائب ، مثل الآية التي تقول : (فويل للمصلين) ولم يكملوا الآية )

محمد : يا بوي أنا بس أكبر بدي اشتغل مع المصري البليط أو مع السوري الكهربجي أو إنه اهاجر على سوريا والعراق واليمن لأنه أنا بسمع أنه رح يصير فيها إعادة إعمار من قبل الشركات الإماراتية التي تديرها الشركات الإسرائيلية في هذول الدول .

فرددت عليه: ليش يا محمد يا بوي خليك هون عندي بتدخل الجامعة وبتكمل دراستك وبتخدم وطنك .

محمد : وطني يا ابوي والله مش داري عني ، عن أي جامعة ودراسة بتحكي يا أبوي ، و خليني إني فعلا رديت عليك و دخلت الجامعة وتخرجت منها ، ما انت عارف إني ما رح الاقي شغل ولا وظيفة ولا سيارة ، ولا رح يصير عندي زوجة ولا بيت ورح أكون مطلوب للتنفيذ القضائي .

يا بوي شوف اولاد اعمامي هيهم تخرجوا من أحسن الجامعات ، فمنهم مهندسين وقانونيين وإلهم 5 سنوات متخرجين ومنهم تقاعد وهو عاطل عن العمل ، يعني صار له 16 سنة مِتخرج ، وحتى إنه انا سمعت انه واحد منهم بده يروح على أفغانستان للجهاد وواحد ثاني
بده يتاجر بالمخدرات !!
بعدين انا اٍذا ما هاجرت بدي اشتغل مع السوري الكهربجي أو البليط المصري ، لأنه انت واعمامي كل يوم أو يومين بجيبوا كهربجي أو موسرجي وبيوخذ منكم 25 دينار على شغلات ما بتوخذ منه أكثر من 10 دقايق ، وبلكي يا بوي شفتلنا نائب يتوسطلنا عند المصرية بسوق الخضار المركزي أو السورية بمحلات الحلويات حتى يشغلونا معاهم ، لأنه المصري ما بيشغل إلا مصري والسوري ما بشغل إلا سوري .

يا بوي انا شايفكم كيف بتترجوا الموسرجي والكهربجي حتى يجي لعندكم ! وبس يجي علينا بصير يستقبل تلفونات من ناس يترجوه يروح لعندهم .

يا بوي يا حبيبي أنا يا بصير نائب بمجلس النواب ، لأنهم هذول معاهم سيارات لاند كروزر سوداء ، وفلوس وبغتصبوا الأراضي والأرصفة وبيعيًنوا اولادهم وبناتهم ، وبفتحوا لهم شركات وبسمسروا بالواسطات و بستأجروا صحفيين أو إعلاميين أو بعملوا محطات تلفزيونيه أو مواقع اخبارية أو قنوات إذاعية وبصيروا يهاجموا الناس الذين يحاولو ان يخربوا شغلهم ومصالحهم ، وبعدين بصير أنا من الجونيات الي انت بتحكي عنهم دايما ،
او بتلاقيلي واسطة اشتغل مع اللاجئين أو الوافدين الموسرجية والكهربجية والبليطة .

وأخير انتهى الحوار بعبارة منه حيث قال لي فيها : انت بتفكر إنه انا ما بعرف شيء ، انا بعرف كل شيء سألتك عنه .
بس طلعت انت الي ما بعرف شيء ولا بتعرف ما هو مستقبلي أو مستقبل وطني .

فرددت علية بعبارة
……لا حول ولا قوة إلا بالله…